教堂變劏房,上帝也瘋狂

發表於 2012-12-08 05:00 | 來源:互聯網

教堂劏房

好多年前有一套電影叫做《上帝也瘋狂》,勢估唔到上帝真係有必要瘋狂,皆因神聖嘅教堂竟然變咗市俗嘅劏房!

呢嗱嗱嗱,千祈唔好以為功夫茶同大家開玩笑,莊嚴肅穆嘅教堂淪為違規經營嘅劏房係千真萬確嘅殘酷現實。事發現場係大埔錦山村一座超過半世紀嘅教堂,叫做港澳信義會聖恩堂。教堂負責人解釋,由於位置偏遠,不便教徒出入,所以去年十二月搬咗去瑞安街,空置咗嘅教堂就由發展商收購,當時話會拆卸重建喎。可能新業主認為六千平方呎嘅面積改建成十三間劏房更加有利可圖啩,所以拆卸重建就唔見,十字鎅豆腐就存在,兩層高嘅建築物家陣成為蝸居一族嘅聚腳地,雖然未至於化身擠滿人形沙甸魚嘅「七十二家房客」,之但係「同一屋簷十三伙」,點都唔可以話係空間寬敞。

教堂變劏房,上帝也瘋狂

本報記者曾經以租客身份睇樓,發展商當時正在裝修劏房,負責放租嘅地產經紀就話嘞,環境唔錯o架,一租就住得,附近搵唔到,每月租金三千至六千五百元,視乎房間大小而定。

喂喂喂,明明係教堂,變咗做劏房,心智只要稍為正常少少都會覺得有問題啦。事實上屋宇署發言人表示,呢一座咁別具特色嘅聖殿住宅區改建工程並未得到批准,已經先後兩次發出清拆令,要求業主於限期前恢復原狀。簡單咁講,業主明知犯法,住客亦明知違規,之不過人人當屋宇署冇到,入住嘅繼續入住,收租嘅繼續收租。

莫講話教堂劏房有價有市吖,新界有好多另類住宅同樣不愁客源。大家有冇聽過豬欄劏房?大家又有冇聽過雞欄劏房?總而言之有地有屋就有人願意交租入住,貪嘅係相對廉宜嘅租金換取有瓦遮頭嘅卑微生活。你估個個都有能力學似前特首曾蔭權咁樣企圖以每月十幾萬銀租住深圳禮賓府嘅咩,劏房之所以受歡迎,無非因為賤物鬥窮人,草根階層唔想瞓街就要無奈蝸居於一百幾十呎嘅豆腐膶單位。

教堂變劏房,上帝也瘋狂

講來講去講到尾,一日最衰都係特區政府嘅房屋政策太失敗,私人住宅貴到冇人有,公營房屋少到冇朋友,你叫月入一萬幾千嘅打工仔點算好吖?本來話要發展新界東北興建住宅,點不知處理得笨手笨腳,一嘢畀人捉住話柄批評大搞「割地賣港」,即使真係有人上綱上線,都要官老爺夠笨拙先至有機會令人乘虛而入。

即係咁,官有官僭建,民有民劏房,家陣搞到連教堂都晾滿胸圍底褲,有乜法子上帝睇見唔瘋狂吖?如果真係要撥亂反正,唔該一眾高官先向上帝懺悔,贖咗自己僭建嘅罪再去贖房策失敗嘅孽!

Related Posts Plugin for WordPress, Blogger...
喜歡 A096生活風向標 的文章,那就通過 RSS Feed 功能訂閱閱讀吧!

返回首頁 | 關於我們 | 版權聲明 | 廣告合作 | 友情鏈接 | 聯繫我們