FIFA 13陰濕招盡收錄

發表於 2012-09-26 21:00 | 來源:互聯網

FIFA 13

足球遊戲大作《FIFA》系列資料夠真,但為人詬病係球員動作唔夠神似,AI又爭少少。經呢幾年嘅努力,依家各方面都做得好逼真!即將推出嘅最新版本《FIFA 13》相比上集變化唔算太大,但玩過Gamescom試玩版本,發現球員控波、爭身位時都夠像真,輸身位時,可以鬼鬼祟祟加力推人背脊,等佢失平衡再攞波,陰濕招都模擬得到!

FIFA 13陰濕招盡收錄

FIFA 13 – 背脊出掌攞身位

其實上一版本《FIFA 12》已經有Player Impact System,即係模擬球員碰撞時的真實物理反應,可以鬥食身位攞波。可是系統有瑕疵,自己球員會失驚無神撞埋一堆,又未必做到先食位後攞波。今年新版本就改善咗,更可以出埋陰濕招,就算輸咗身位、輸咗先機,後衞都可以喺對方前鋒背後出手推,等佢失平衡射門「撻Q」或者控球甩腳,夠真實。而且就算無對手壓迫都好,接應遠距離傳球都偶有失腳,個波往往彈離身幾丈遠,要知道並唔係個個球員都係貝碧托夫,呢樣確實像真!

FIFA 13陰濕招盡收錄

FIFA 13 – 巧妙走位破越位

AI系統係《FIFA 13》另一處改良咗嘅地方,不論傳波定走位皆有改良。以前明明想交直線畀最遠走空位嘅隊友,但電腦往往會交咗畀較近嘅隊友。《FIFA 13》就唔同,交波可以隨心所欲,而且電腦AI強,隊友會識得走位迎波,當交波畀隊友甲,隊友乙會即時改變原有路線配合走位;仲有今集隊友唔會盲目死衝接應直線而越位,反而會聰明地兜後走,跟後衞平排後再向前走破越位陷阱,亦識得接應兩邊傳中時從盲眼位楔入搶點,超真實。至於處理罰球亦有心思,攻方可以選擇由三個球員諗計炮製,而守方可以隨時加減人牆人數,或者安排球員飛身出去攔截,但最陰濕係可以偷雞移前兩步。

FIFA 13陰濕招盡收錄

FIFA 13 – 現實世界融入遊戲

《FIFA》系列嘅球隊同球員資料出名夠多夠齊,《FIFA 13》已確認有得玩30個地區聯賽,不過最新加入嘅沙特阿拉伯聯賽真係可有可無,反而有唔少Fans嘅阿根廷聯賽就未見影。最抵讚係《FIFA》系列會將現實足球世界融入遊戲入面,好似真實球員受傷、停賽、狀態滑落都會喺《FIFA 13》反映出嚟,甚至乎球員最新嘅花邊新聞消息,都會不時Update放入球賽評述入面,唔怕玩成年都係得嗰F幾句評述咁悶。至於封面就用上阿根廷球王美斯,佢之前連續三年都係對家《Winning Eleven》系列嘅封面人物,嘩!球王跳槽喎!

Related Posts Plugin for WordPress, Blogger...
喜歡 A096生活風向標 的文章,那就通過 RSS Feed 功能訂閱閱讀吧!

返回首頁 | 關於我們 | 版權聲明 | 廣告合作 | 友情鏈接 | 聯繫我們