點解女人唔願離開賤男人?

發表於 2012-10-07 05:00 | 來源:互聯網

點解女人唔願離開賤男人?

做男人唔怕冇腰骨,最怕背後冇女人撐。

「感情缺失男」醜聞不斷,無論篤蘇州便便有幾臭,都總有「賢內助」喊住幫手清理。大家可憐太太之餘,亦欣賞佢夠含忍包容,視佢為家嫂嘅典範……。「偉大」定「犯賤」只差一線,但出發點都真的是「愛」嗎?

外國有調查發現,女人唔肯離開賤男嘅五大常見原因無一跟真愛相關。無論你嘅愛情生活有沒有唐生唐太咁多風浪,只要你於一段關係中得不到幸福快樂,就係時候認清一下自己有沒有下列想法。

1、「我就係咁命苦」

唔少女人千揀萬揀餐餐都揀中個爛燈盞,久而久之賴神賴鬼賴命運──係阿媽生我條命咁苦。其實,歸咎父母又真係唔錯得曬。心理學都有教,父母用錯管教方法,令一個小朋友感受不到愛,會從小就認定自己不值得被愛,於是長大成人後,受潛意識影響下,傾向被一類滿足不到他情感需求的壞男人所吸引。專家話,這類姊妹願意含辛茹苦留守在賤男身邊,期待有朝一日得到對方注意。

2、「我信佢會改過」

好多女士將「浪子回頭金不換」的故事幻想得太美麗,其實呢句話說明賤男覺悟改過的機會微乎其微,否則又點駛「金不換」呢?「死性難改」呢句話更貼近現實,心理學又有教,人的性格、核心價值以至各種行為,是小時候受家庭(特別係父母)的影響而形成。三歲定八十,多情男人唔會輕易變得專情,可惜唔少姊妹對浪子回頭抱有太大希望,結果因期望而失望,唯有一喊置之。

3、「其實我都有責任」

個男人成日鬧你批評你,得你搵佢冇佢搵你,約親都遲到甚至冇到,年年唔記得你生日,紅酒情慾短訊私生子通通冇你份,仲要大禍臨頭搵你揹飛……。你都唔介意的話,可能你需要加強自尊心。

女人肯同一個賤到出面嘅男人一齊,外國臨床心理學博士Dennis Sugrue解釋,「因為小時候得不到父母的愛。每當發生問題,會較易將件事合理化,歸咎自己,然後將責任揹上身。」搵個完美情人就話唔易,但搵個比賤男好少少的男人其實係冇難度,可惜自尊心較低的姊妹未必睇得透呢個事實。

4、「我唔想孤獨終老」

女孩子自小被「公主與王子從此快樂地一起生活」的童話故事洗腦未必有問題,問題係擺錯重點,忽略了「快樂地」,又誤以為女人有男人「一起」才能生活,害怕將來要做老「孤」婆。害怕孤獨嘅想法,說穿了,其實係「我需要男人照顧」,抱有此憂慮的女生,反映出佢地自我照顧能力低,所以寧願留守賤男身邊,都唔願一人快樂。

5、「佢冇咗我唔得」

有心理學家指,即使從對方得到的回報比自己所付出的少,女人都寧願蝕底地繼續付出,唔少臨床個案甚至會幻想好多可能性,擔心對方因為分手後一蹶不振,甚至染上壞習慣如吸毒賭錢自殘等等,於是唯有「被迫」留喺佢身邊。其實,無論男女都喜歡「被需要」,因為自我感覺良好。重要嘅係,要認清究竟係「佢冇咗你唔得」,定係你驚冇人再需要你?別忘記,他的生活唔係只有你。

Related Posts Plugin for WordPress, Blogger...
喜歡 A096生活風向標 的文章,那就通過 RSS Feed 功能訂閱閱讀吧!

返回首頁 | 關於我們 | 版權聲明 | 廣告合作 | 友情鏈接 | 聯繫我們